ہمارے بارے میں جانیں

ہمارے بارے میں جانیں

کمپنی کی بنیاد2010 میں مصنفہ صوفیہ عدیم نے رکھی۔
آئی سی ای پبلشرز نصابی کتابوں، رہنمائے استاد اور تدریسی طریقہ کارکے ساتھ ساتھ ہر قسم کی سمعی بصری امداد کی پرنٹننگ اور پبلشنگ کا واحد ذمہ دار ہے۔

کردار سازی کا یہ نصاب بنیادی اسلامی اور آفاقی اقدار کو مدنظر رکھ کر بنایاگیا ہے اور انہیں متنوع انتخاب کے تدریسی طریقہ کار کے تحت پیش کیا گیا ہے۔ اس نصاب میں اقدار سے مراد نیکیاں، مثالی کردار اور ایسی خصوصیات ہیں جو رویوں، عقائد، برتاؤ اور اعمال کی بنیاد بناتی ہیں۔ اخلاقیات کی اصطلاح سے مراد اُن معینہ اخلاقی اصولوں کو عمل میں لانا ہے جو آفاقی ضابطہ اخلاق کی ترویج کرتے ہیں۔ یہاں پر اخلاقیات سے مطلب مذہبی اقدار اورنیک اعمال ہیں۔

مسلم ممالک کے لیے کردار سازی کے نصاب کا آغاز

اس پروگرام کے آغاز کا پس منظر یہ ہے کہ اخلاقیات تدریسی طور پر موثر طریقے سے بچوں تک بتدریج پہنچائی جائیں۔ اس سے پہلے اس نقطہ نظر کی طرف یا تو دھیان نہیں دیا گیا یاپھر اس کا اطلاق ناکافی رہا۔حالانکہ یہ کہنا غلط نہ ہو گا کہ یہ عصر حاضر کے بیشتراسلامی سکولوں کی اشد ضرورت بن چکاہے۔

ہمارا مقصد اکیسویں صدی کے اسلامی مُمالک کو ایک ایسا جامع اور مکمل نصاب فراہم کرنا ہے جو سکول جانے والے بچوں میں اخلاقی پختگی پیداکرسکے اور انہیں مطلوبہ اخلاقی، احساساتی اور معاشرتی مہارتوں سے آراستہ کر سکے۔یہ سکول میں پڑھائے جانے والے دوسرے مضامین کے ساتھ ایک اضافی مضمون کے طور پر پڑھایا جائے گا۔ کردار سازی کا مضمون اس انداز میں ترتیب دیا گیا ہے کہ یہ بچوں میں خود آگہی، ہم احساسی، ضبط نفس، اخلاقی استدلال، مسائل کا سلجھاؤ، ذاتی عکاسی،اور محاسبہ نفس کی سمجھ بوجھ پیدا کرسکے اس کے علاوہ مطمع نظر یہ بھی ہے کہ بیان کردہ صلاحتیں ان کے کردار کا ایک حصہ بن جائیں۔ ہماراعزم انہیں مختلف اسلوب سے لیس کرنا اور کردار کو اس طرح سنوارناہے کہ زندگی کے امتحان میں اُن کی کامیابی کا امکان بڑھ جائے۔ اس کا حصول طلبہ کی آگہی، ہم احساسی، خدا شناسی، خدا خوفی اور راست بازی کوپختہ کرنے سے ہو گا۔ اس کے ساتھ ساتھ یہ کورس عملے کے ارکان کو ایسی مہارتیں فراہم کرے گا جو اقدار کو عمدہ اور موثر طریقے سے آگے پہنچانے میں انشاء اللہ مدد گار ثابت ہو ں گی۔

اس مضمون کی انفرادیت اس میں موجود جدید تدریسی طریقے ہیں۔ ماضی میں کئی اسلامی ممالک میں متعددچھوٹے چھوٹے پروگرام تیار کئے گئے جو مصنفہ کی تحقیق اور سولہ سالہ تجربے کے مطابق عمو می تربیتی مہارتوں کے چندمغربی اسلوب تک محدود ہیں جواکثر تعلیمی اداروں نے سیاق و سباق اورمعاشرتی اقدار کو مد نظر رکھے بغیر اپنا لئے ہیں۔ یہ طریقے نہ ہی اتنے جامع ہیں جتنی جامعیت کرداری تعلیم کے لیے ضروری ہے اور نہ ہی یہ اتنے کافی ہیں کہ نصاب کے مقاصد کا حصول ممکن ہو۔

ایک اورعمومی طریقہ جو دیکھنے میں آتاہے وہ یکطرفہ پندونصائح ہیں۔ اس میں عموماً بچوں کونظم و ضبط سکھانے کے لیے ہاتھ کی انگلی اُٹھا کر خبردار کیا جاتاہے جو پرانے دور میں چلتا تھا۔ بچوں کو زیادہ ترانتہائی نتائج سے آگاہ کیا جاتا ہے، یہ خصوصاً دوزخ کی خوفناک سزاؤں سے دھمکانے اور جنت کے غیر معمولی اجر کو اُجا گر کر کے کیا جاتا ہے۔

کردار سازی کے پروگرام کے مقاصدکے حصول کے لیے نظم و ضبط پیدا کرنے کے منفی طریقے کم ہی فائدہ دیتے ہیں، بلکہ اس طریقہ تعلیم میں زیادہ امکان اس بات کا ہے کہ طلبہ ان بھاری اور ناخوشگوار باتوں سے دور بھاگنے کی کوشش کرنے لگیں اور یوں کردار سازی کا مقصد فوت ہو جائے ۔ تعلیمی نفسیات نسبتاً ایک نیا مضمون ہے۔ا س کے تحت فراہم کردہ تعلیمات اکثر و بیشتر بچے کی ادراکی نشوونما کے ساتھ ہم آہنگ نہیں ہو تیں یعنی یہ تعلیمی طریقے بچے کی نفسیات سے مکمل طور پر وابستگی نہیں رکھتے ۔ بیشتر ممالک میں تعلیمی نفسیات کا تصور اتنا معروف نہیں کہ نصاب بنانے کے لیے صرف اسی کو استعمال میں لایا جائے۔ اس وجہ سے ٹیچرز کی ٹریننگ یا براہ راست طلبہ کی تربیت کے لیے استعمال کی جانے والی تکنیکس اور مضامین بچوں کی ادراکی نفسیات سے مطابقت نہیں رکھتے اور اکثر اوقات تو یہ طریقے بنیادی انسانی نفسیات سے بھی دورہوتے ہیں۔

مثال کے طور پر بچے اس نازک عمر اور نشوونما کے ابتدائی درجہ پر جنت اور جہنم کے تجریدی اور وسیع تصورکو مکمل طور پر سمجھ نہیں پاتے ۔ اس لیے ان کا سامنا زیادہ سے زیادہ ایسی مثالوں اور مسائل کے ساتھ کروانا چاہیے جو ان کی سمجھ بوجھ، تجربات اور حقیقت سے مطابقت رکھتے ہوں تاکہبیان کردہ تصورات کو مکمل طور پر اپنایا جا سکے۔

سیکھنے کا یہ پہلو بعض اوقات معاشرتی سطح پربھی ایک حساس معاملہ بن جاتا ہے اور اس کی اہمیت کو سمجھنے کے باوجود یہ اکثر ہماری توجہ سے محروم ہی رہتا ہے۔اس کورس کو ا یسے عملی انداز میں پیش کیا گیا ہے کہ اخلاقیات کو تخلیقی، درست اور موثر طریقے سے بچوں کے حساس اور نازک ذہنوں میں اس طرح جذب کیا جائے کہ وہ ہر گزرتے سال کے ساتھ درجہ بدرجہ ان کی ذات کا حصہ بن جائے ۔

مزید یہ کہ زیادہ تر مذہبی اداروں کے تعلیمی مواد کا بڑا حصہ زمانہ قدیم کے قصوں اور مذہبی واقعات پر مشتمل ہوتا ہے۔محض یہ طریقے جدید دور کے بچوں کی تربیت کے لیے نا کافی ثابت ہوتے ہیں کیونکہ یہ انہیں اپنی ذہنی سطح، روزمرہ معمولات، مشاہدات اور تجربات کے لحاظ سے اجنبی لگتے ہیں۔

بچوں میں اخلاقی اقدار اپنانے کی تحریک پیدا کرنے کے لیے جانے پہچانے، دلچسپ، دلکش ، دعوت دینے والے موثرطریقوں کو مثبت تقویت کے طور پر استعمال کیا گیاہے۔کردار سازی کا یہ نصاب اس طرح وضع کیا گیا ہے کہ تعلیمی نفسیات میں موجود مختلف طریقوں کے ذریعے اخلاقی تعلیم بہتر طور پرفراہم کی جا سکے۔ ایسے طریقے جو تدریسی فکر کی مستحکم بنیاد پر رائج ہیں اور آموزش یعنی سیکھنے کے مختلف انداز اور درجوں پر مبنی ہیں۔

اس نصاب میں پیش کیا گیانقطہ نظر انشاء اللہ پوری مسلمان دنیا میں رائج مذہبی تعلیمی روایات کے لیے ایک نیاسنگ میل ثابت ہو گا ۔ قسم قسم کی کہانیوں، حقیقی زندگی کے واقعات، آڈیو ڈراموں، ڈرامہ سازی، تخلیقی اور ذاتی شمولیت پر مائل کرنے والی عملی سرگرمیاں،مشقیں،سوالات، مسائل کے سلجھاؤ کی تربیتی نشستیں ،ثالثی ، مثبت تقویت کا طرزعمل (جو دین اسلام کی تعلیمات کے مطابق ہے۔)، مہارتیں پیدا کرنے کی تکنیکیں اور تدابیر، کوچنگ، گوشہ علم وفہم کے عنوان میں فراہم کردہ تحریکی مواد، مزاح اور لطائف کا استعمال، منتخب اقوال اور محا ورے، منتخب کردہ قرانی آیات اور احادیث ان سب کو ایسے تخلیقی انداز میں مرتب کیا گیا ہے کہ یہ بچوں کی سوچ کے اندازکی نشوونماکریں۔

ہوم ورک نہ ہونے کے برابر اور کسی گریڈ کی فکرنہیں لیکن بہت سی کہانیاں، دو طرفہ بات چیت، ڈراما سازی، غیر روایتی مشقیں ، عملی مشقیں اور ان سب کی پیشکش کے ایک پر لطف انداز سے امید ہے کہ یہ انشاء اللہ بچوں کا سب سے پسندیدہ مضمون بن جائے ۔ پسند ایک طرف لیکن اگرہماری یہ نسلیں اچھے انسان ہی نہ بن سکیں تو اس دنیاوی تعلیم کا آخر کتنافائدہ رہ جاتا ہے؟

یہ وہ مضمون ہے جو بچوں کی جڑوں کو مضبوط بنا کر ان کی اسلامی بنیاد کو پختہ کرنے میں اپناکردار ادا کرے گا۔

ممتاز ماہرین تعلیم کے مطابق یہ کردار سازی کا ایساوسیع اورمکمل نصاب ہے جس کا ایک عرصے سے انتظار تھااور جسے اب جدید دور کے مسلمانوں کے لیے پیش کیاجا رہاہے۔
مصنفہ کی دلی خواہش اور دُعا ہے کہ یہ نصاب اساتذہ، ماہرین تعلیم اور والدین کو اس تخلیقی اور تحریکی طریقہ تعلیم کو اپنانے میں اس حد تک مدد دے کہ اخلاقیات بچوں اور نوجوانوں کے ذہنوں تک رسائی پا جائیں۔ ایسے تعلیمی طریقے جو مندرجہ ذیل سے مطابقت رکھتے ہوں :

بچے کی نفسیات
ایسے طریقے جو زور زبردستی کے بجائے فطری انداز میں بچوں میں اخلاقیات اپنانے کی تحریک پیدا کرتے ہیں۔
جو تعمیری ہونے کے ساتھ ساتھ دیرپا اور مفید بھی ہوں۔

ہم دعاگو ہیں کہ یہ کوشش ایک ایسے رجحان کا آغاز ہو جو اخلاقی تعلیم کو سکولوں کے ذریعے بچوں تک پہنچانے کا ذریعہ بن سکے۔ ایسی اخلاقی تعلیم جس کی بنیاد اسلام اور تدریس کے بنیادی اصولوں پر رکھی گئی ہے۔ آمین